PATAY ang sa usa ka kanhi sakop sa Cagayan de Oro Police Office (Cocpo) tungod kay duna kini gihambing nga balatian apan gumikan na usab sa bahad sa coronavirus disease (Covid-19) diretso kining gilubong.
Ang maong kanhi pulis mao si Police Captain Ludwig Charles Espera, 45 anyos, namatay gumikan sa cardiac arrest.
Namatay kini Abril 14 mga alas 10 sa buntag ug gilubong gyud dayon mga alas 3 sa hapon.
Gibutyag ni Police Major Evan Vinas, tigpamaba sa Cocpo, nga duna na kini gihambing nga balatian ug semana na nga na-admit sa tambalanan ug gipanghimakak usab sa pamilya niini ang alegasiyon nga usa kini sa mga nisalmot sa derby sa Matina Gallera, Davao City.
“He was an ex-member of Cocpo. Nag ICU siya 2012 & 2016 then lately before his one-week confinement he suffered mild stroke po maam,” matud ni Vinas.
Gidugang pa nga duna kini enlargement of the heart rason nga gidala sa ospital ug giklaro nga wala kini nakaadto sa maong derby sa Davao base sa pamilya.
Gibutyag ni Mayor Oscar Moreno nga ang maong pasyente nagpaalim sulod sa pribadong ospital sa dakbayan ug duna na kini balatian apan gikonsidera nga Sever Acute Respiratory Illness (SARI) nga pasyente.
“Kauban nila kanhi who had already separated himself from the service pero naay pre-existing condition pero kuan siya SARI,” matud ni Moreno.
Samtang buot usab ni Moreno nga ipa-trace ang nagpakatag og pekeng balita kalabot na niini ilabi na nga importante kaayo ang insaktong impormasiyon nga angayang ipaabot sa katawhan.
“Nagpost sa facebook gikopya kunohay katong text message pero katong suspected SARI gipulihan sa term nga suspected Covid...mao tong akong giingon ni Major Vinas nga ipa-trace sa cybercrime,” dugang pa.
Kahinumdoman nga namahimong kontrobersyal usab si Espera human nga napailalom sa disciplinary action tungod sa kasong giatubang lakip na administratibong kaso ug ni-apelar aron nga makabalik sa serbisyo.