KAPIN P1.2 milyones na ang nahatag nga serbisyo sa Misamis Oriental Care System (MisOr Cares) gikan sa pagsugod sa maong programa.
Dako ang kalipay ni Misamis Oriental Governor Yevgeny Vincente Emano nga nagsaulog na usab ang MisOr Cares sa ika-upat nga anibersaryo.
Matud ni Emano nga matag kasaulogan sa MisOr Cares, ang mga empleyado naandan nga nagselebrar ug maglingaw-lingaw apan karong tuig mas gipili sa nangulohan niini nga si Pipip Akut nga iselebrar kini sa lungsod sa Lagonglong, Misamis Oriental.
Usa sa highlights sa programa ang pagbugkos sa kaminyoun sa 114 ka paresan gikan sa napulo ka barangay sa Lagonglong.
Aduna untay libreng serbisyong mediko ug uban pa apan gumikan sa kusog nga ulan giuswag kini sunod semana.
Matud ni Emano nga 40 ngadto 60 porsiyento sa pundo sa kapitolyo iyang gibubo ngadto sa panglawas lakip kining MisOr Cares.
Sa upat sab ka tuig moabot ngadto sa 1.236 milyon ang serbisyong natunol diin langkoban sa 800 ka Misamisnon matag adlaw ang nakabenipisyo.
Gibutyag niini nga napugos siya pagtukod sa MisOr Cares gumikan kay upat ka tuig gikan sa iyang paglingkod gipadalhan siya og sulat sa PhilHealth nga dili na modawat og Phil health card tungod sa kadako sa utang nga gibilin sa kanhi administrasyon nga mobalor og P244 milyon. (SVB)