GIPANIGURO sa Kapitolyo Probinsyal nga luwas gihapon nga sak-an ug trabahoan sa mga trabahante human nasinati ang Intensity 4 sa dakbayan sa Cagayan de Oro gumikan sa 6.9 magnitude nga linog nga nabati sa Padada, Davao del Sur mga alas 2 sa hapon niadtong Dominggo, Disyembre 15.
“Ready for reoccupation” ang paghulagway ni provincial engineer Mario Batar ug Provincial Disaster Risk Reduction Management Office (PDRRMO) head Fernando Vincent Dy human gisuta ang tibuok nga gambalay sa Kapitolyo kon wala bay namatikdan pagkausab sa estruktura o pagpangliki ba kaha sa dingding.
Gisiguro sa duha ka opisyal nga luwas pa gihapon gamiton ang balay lungsod sa lalawigan hangtud karon.
Sa iyang bahin, gipadangat ni Misamis Oriental Governor Bambi Emano ang iyang pahasubo sa gidangatan karon sa Davao del Sur labina sa pamilyang nawad-an og sakop kay nadat-ogan gumikan sa kusog nga linog.
Niagi lang bulan, nagpaabot og tabang ang Kapitolyo Probinsyal sa Davao del Sur gumikan sa pagtay-og niadtong Oktubre 31 ug imbes hinay-hinay nga mibangon nasubli na usab ang nahitabo sa maong lalawigan kung diin daghan sa mga gambalay ang nangaguba lakip puloy-anan.