GIBUTYAG sa tinugyanan sa Cagayan de Oro Police Office (Cocpo) nga gipaspasan ang ilang mga operasiyon aron nga masiguro ang seguridad sa kasaulogan sa Pasko.
Sa pakighinabi ngadto kang Police Superintendent Mardy Hortillosa, tigpamaba sa Cocpo nga daan na nila kining gipahigayon apan tungod usab sa nagkadaghan nga insidente hinungdan nga gipaspasan ang mga operasiyon.
“Kani siya daan pa ni sauna pa tungod sa kadaghan pud sa insidente gipaspasan nato para atong yuletide season mahimong secured,” pahayag ni Hortillosa.
Nasayran nga mokabat sa 44 ka mga indibidwal ang nasikop atol sa Cocpo Peace and Order Drive diin pipila niini ang mga dunay pending nga warrant of arrest, nakalapas sa ordinansa sa siyudad ug sa bala-od ug uban pa nga kalapasan lakip na mga motorsiklo nga walay insaktong dokumento, video karera, ug armas.
Sa pagkakaron padayon ang kapulisan sa paghatag og seguridad ilabi na sa panahon sa Misa de Gallo ilabi na sa mga dagkong simbahan sa siyudad.