GIKUMPIRMAR ni Misamis Oriental Governor Yevgeny Vincente Emano nga mobalor sa $250 milyones ang gitagana aron mas mapalambo pa ug mapanindot ang Laguindingan Airport nga gitakdang mahimong international airport.
Gibutyag ni Emano nga karong tuiga kini sugdan, ug ang nasod sa South Korea maoy mohatag sa pundo ang agi og tabang nga mas mapalapdan ang serbisyo nga dili lang domestic, apan international flights ang moabot niini.
Gikalipay sab kini nga kalamboan tungod ang makabenipisyo niini ang katawhan sa lalawigan kon diin madugangan ang pangempleyo ug labaw sa tanan mas modagsa pa ang mobisita nga mga turista dili lamang gikan sa kasikbit nga probinsya apan nagikan na gyod sa laing nasod tungod derekto kining moabot sa lalawigan.
Nasayran nga ang pundo ipaagi sa National Economic Development Authority ug karon gipangandaman na sa Provincial Planning and Development Office. (SVB)