GITUOHANG gi-salvage ang usa ka lalake nga napalgang wala nay kinabuhi sa hilit nga bahin sa Puntagorda, lungsod sa Balingasag, Misamis Oriental Miyerkules sa kadlawon, Oktubre, 2, 2019.
Gibutyag ni Police Major Cecelio Orcullio, hepe sa Balingasag Police Station, nga padayon pa ang kapulisan sa pag-ila sa biktima aron pagsusi kon ngano ug kinsa ang nipatay niini.
Gibana-bana nga nagpangidaron kini og 30 ngadto 40 anyos pataas, anaa sa 5'2" ngadto 5'4" ang katas-on, semi-opaw, tambukon ug naka-pajama, nga gihulagway nga nagsul-ob og panapton nga pangtulog.
Sa pakisusi sa Scene of Crime Operatives nasuta nga ang biktima nakaangkon og duha ka samad sa ulo ug duha sa dughan nga bahin kon diin nakuha ang upat ka basyo sa bala sa wala pa matino nga armas.
Gidala sa punerarya sa dapit ang biktima.
Tungod wala mailhi sa mga residente ang biktima, nanawagan ang kapulisan sa mga nawad-an og sakop sa pamilya ngamamahimong mobisita ug makigkoordinar sa Balingasag Police Station.