GIDUNGGAB sulod sa motorela ang usa ka lalaki tungod sa druga, mga alas 6 sa gabii niadtong Nobyembre 15, sa Sta. Cruz, Bolonsori, Barangay Camaman-an, dakbayan sa Cagayan de Oro.
Patay si Allan Absin, 46, residente sa maong dapit, samtang ang suspetsado naila nga si Rodney Abrogenia.
Matud sa Police Station 2 (PS2) sa Cogon, gikabutyag nga patay na nga nahidangat sa Maria Reyna Xavier University Hospital ang biktima.
Giingong samtang anaa kini sakay sa motorela kalit kining gidunggab gamit ang hait nga hinagiban. Nakaangkon og duha ka mga samad si Absin sa tiyan ug sa tuo nga bahin sa abaga.
Nigawas sa imbestigasiyon sa kapolisan nga dunay kalambigitan sa druga ang maong panghitabo.
Padayon pa ang operatiba sa kapolisan sa pagpangita sa suspetsado.