NGILNGIG ang kamatayon sa usa ka lalaki nga gipusil ug gidabdaban pa sa wala mailang suspetsado niadtong Hulyo 14 sa kadlawon sa Purok 3, sa Barangay Poblacion, lungsod sa Naawan, Misamis Oriental.
Si Senior Police Officer 1 Senador Ostero, imbestigador sa Naawan Police Station niingon nga wala pay identipikasyon ang biktima karong panahona.
Sa pagresponde sa kapolisan sa dapit mga alas 6:00 sa buntag, nakita nga nasunog na ang biktima apan dili kini totally burned.
Paghulagway sa biktima, itumon, adunay pagkakulot ang buhok, gibanabana nga anaa sa 25 ngadto sa 30 anyos ang pangidaron, ug patik sa walang bahin sa iyang kamot nga adunay marka nga "Noel."
Ang biktima aduna usab pinusilan sa ulo ug sa iyang dughan diin makita usab ang duha ka basyo sa bala.
Gibaatan og masking tape ang baba niini ug gituohang gibuboan og gasolina ang lawas ug gidabdaban.
Matud ni Ostero nga dili residente sa dapit ang biktima apan gituohang gidala lamang kini sa dapit ug gipatay nga posibleng nahitabo kaganinang kadlawon.
Nanawagan ang kapolisan sa mga pamilya nga nawad-an og sakop sa pagtaho sa ilang buhatan aron maila ang biktima ug masayran ang rason sa brutal nga pagpatay niini.
