GIPASAKAAN na og kaso ang suspek nga nasapon nga nanguha og tulo ka mga perfume niadtong Agusto 30, 2018 sa Abellanosa-Velez streets, dakbayan sa Cagayan de Oro.
Naila ang suspek nga si Gary (bansagon gitago), 40, ug residente sa Purok 4, Poblacion Velencia City.
Sa nahipos nga impormasiyon, giingong nasapon mismo si Alex Opeña, guwardiya sa usa ka convenient store nga nahimutang sa maong dapit, nga gikuha niini ang tulo ka mga perfume nga nagkantidad og P140 ang matag usa.
Sa pakighinabi ngadto na kay Police Chief Inspector Julius Clark Macariola, hepe sa Police Station 1 (PS1), nga napasaka na ang kaso gumikan kay pursigedo usab nga mopasaka ang nahisgutang patigayon nga gikawatan sa suspek.
“Napasakaan na na kagahapon pero ibalik karon sa prosecutor for inquest, mo file man gyud,” pahayag niini.
Nasayran nga rason sa suspek nga nahimo ang maong sala-od gumikan kay nagtugon ang asawa nga magpapalit og perfume ug dili siya makadulog kung dili makapalit gumikan kay wala kini kwarta kay usa lamang ka drayber.