POSIBLENG masugdan na ang proyekto sa Department of Public Works and Highways (DPWH) human nagkapirmahay na tali sa Limketkai alang sa memorandum of agreement (MOA) niadtong Pebrero 8, 2019.
Kini alang sa proyekto nga hydraulic drainage aron mapugngan ang problema sa baha sa dapit.
Malipayon usab nga gipahibalo ni Kagawad Teodulfo "Bong" Lao, chairman sa komitiba sa public utilities nga nagpinirmahay na ang DPWH ug ang Limketkai human usab nga nahatag na ngadto kanila ang ilang gipangayo nga opisyal nga komunikasiyon nga mo-agi sa ilang dalan mismo ang konstraksiyon sa maong proyekto.
"Initial nato nga negotiation diba nangayo sila og sulat gikan sa Regional director sa DPWH karon naghatag na og formal nga sulat ang DPWH," matud ni Lao.
Giingong posibleng masugdan na ang pagtrabaho human nga duna na'y gipirmahan nga kasabotan apan buot niini nga single barrel o wala'y poste sa tunga.
"Okay na, nagpirmahay sila atong February 8 sa MOA aron maka start na so pila ka semana gikan karon start na,gikan sa Valenzuela street agian dyaon diha sa ilang dalan main sa Luxe, didto sa ila kinahanglan wala'y poste sa tunga aron lahos-lahos ang tubig," dugang ni Lao.
Kahinumdoman usab nga nalangan ang maong proyekto human nga nagdumili ang tinugyanan sa Limketkai gumikan na usab kay wala kini nakadawat og pormal nga sulat.
Nasayran nga ang hydraulic drainage gitakdang buhaton gikan sa Valenzuela street paingon sa CM Recto paingon sa Limketkai area.
Nasayran usab nga ang pinakaulahing plano kung dili gayud itugot sa Limketkai nga moagi kini sa ilang dalan mao ang pagpahabog sa national highway sa mga anaa sa lima ka metros diin maghimo usab og butanganan sa sobrang tubig diin posibleng ang Limketkai ang mabahan pag-ayo.
Apan dili uyon niini si Lao ilabi na nga ang Limketkai usa usab ka negosyante nga nagbubo og puhonan sa siyudad ug dili kini makataronganon.
"Unfair man pud sa ila nga pasagdan nalang nato nga mabahaan sila, that should not be an option kay investor pud nato sila unya daghan ang ga-trabaho diha sa ila. We will continue with the negotiations and hopefully we can finally agree," matud ni Lao kaniadto.
Dako kini nga kalamboan ilabi na nga masugdan na ang proyekto sa pipila ka mga semana ug mao kini ang nakitang pagmenos usab sa masinatiang pagbaha-baha sa siyudad.