SIKOP ang usa ka maestra ug usa ka mabdos atol sa entrapment operation sa National Bureau of Investigation (NBI) ug Regulatory Compliance Board (RCB) niadtong Abril 3 mga alas 12:00 sa udto sa LBC-Yacapin branch sa Yacapin corner sa Pabayo Streets, ning siyudad sa Cagayan de Oro City.
Ang mga suspetsado giila nga sila Marichu Arias, taga Barangay Tambaling, El Salvador City, Misamis Oriental kinsa giingong usa ka mabdos ug ang usa ka maestra nga si Jasmin Aquino, taga Barangay Indahag ning siyudad.
Gibutyag ni Antonio Resma Jr., nga gikalipay usab nila ang suporta sa katawhan labi na diha sa pagtaho kung ugaling duna'y masayran nga nagbaligya og mahal nga presyo labi na sa mga panginahanglanon karong panahona sama sa mask, alcohol lakip na usab sa mga nag-unang palaliton.
Nag-aghat usab nga dili na mopalit niining mga nagbaligya og mahal aron nga wala nay mosakay sa panahon.
"Amo pud aghat sa katawhan nga kung naa sila'y nakita nga overpricing dili pud nila i-patronize," matud ni Resma.
Mensahe usab kini sa tanan nga ang gobyerno naglihok ug wala nagpabaya sa mga susama niini nga mosakay sa panahon ug magpahimulos sa giatubang nga krisis labaw na niining coronavirus disease (Covid-19). Giingong dili rason nga maghimo niini kay nawad-an sa panginabuhian tungod kay tanan man ang apektado.
"Wala natulog ang gobyerno, importante nga walay magpahimulos, wala'y mosakay sa panahon, wala'y mag overprice kay tanan man ta naglisod," dugang pa.
Narekober ang 16 ka mga KN95 face masks diin gibaligya sa kantidad nga P235 kada usa; 18 ka color blue nga disposable face masks nga P40; 50 ka puti nga disposable face mask; ug 40 ka assorted washable cloth masks.
Gihan-ay na ang tukmang kaso nga ipasaka batok sa maong mga suspetsado.