MGA 40 ka indibidwal ang na-isyuhan og ticket sa kalapasan sa anti-jaywalking ordinance nga gipatuman sa Cogon area niadtong adlaw’ng Martes, Enero 28, 2020 ning Siyudad sa Cagayan de Oro.
Gibutyag ni Antonio Resma Jr., sa City Legal Office ug tigpamaba sa road clearing team, nga sa unang adlaw sa hapon na nagsugod sa pagpangdakop gikan mga alas 4:30.
"Moabot gyud siya og banabana mga 40 nagsugod pa sila gani og dakop didto naman sa mga hapon gyud," matud ni Resma.
Gidugang pa niini nga gawas sa pagpatuman sa anti-jaywalking ordinance daghan usab ang na-isyuhan nga mga sakyanan nga dunay kalapasan ug lakip usab niini ang pagpakanaog sa mga pasahero sa tunga sa dalan.
"Mga jeepney pud nga dili ga-loading ug loading sa yellow box unya ilang ihunong ilang pasahero tunga sa dalan, kadtong manaog sab consider man to siya as jaywalking mao na nga ubay-ubay gyud," dugang pa.
Gihatagan usab og panahon nga magbayad sa maong kalapasan nga P500 sa buhatan sa City Hall ug sa mga walay kapasidad sa pagbayad mahimo usab nga mag-community service.
Padayon nga nagpahimangno ang lokal nga kagamhanan sa siyudad nga tumanon ang tanang balaod dili lang kay duna kini multa apan kini isip disiplina sa kaugalingon ug tumong lamang niini ang kaayohan sa tanan.