MALAMPUSON ang gipahigayon nga Early Childhood Care Development Annual Convention nga gipahigayon niadtong adlawng Martes sa Dela Park hawanan sa Kapitolyo probinsyal.
Si Provincial Early Childhood Care and Development (PECCD) Office head Maryden Ocot nibutyag sa interbyu sa Sun.Star SuperBalita nga dili masukod iyang kalipay nga tungod sa pagtinabanga ug suporta ni Misamis Oriental Governor Yevgeny Vincente Emano kaniya nahatagan og katumanan nga magkatigom ang tanan nga mga magtutudlo nga maoy dako og papel sa pagbaid sa kahibalo sa mga kabataan.
Ubay ubay nga mga papremyo ang naangkon sa mga magtutudlo nga gihatag sab gikan sa mga Sangguniang Panlalawigan members lakip anaa ang presensya nila ni Christian Unabia ug kanhi kongresista Benjo Benaldo.
Matud ni Ocot nga highlight sab sa programa ang pagpili sa Most outstanding ECCD Worker ug Commitment awardees ngadto sa mga ECCD workers nga kuhaon sa matag lungsod ug gipili sila pinaagi sa ilang talagsaon nga performance, ang makadawat og commitment awards gipili sab pinaagi sa ilang taas nga panahon sa pagserbisyo sama sa 15 ka tuig pataas.
“Sila nakadawat og certificate of appreciation and of course cash incentives from the provincial government kay naglantaw mi nga tungod sa ilang dakong pagpaningkamot dako gyod kaayo og kalamposan ang early education,” matud ni Ocot.
Sa paghatag pasidungog sa mga magtutudlo aron mahimong outstanding nakita nga dili tiaw ilang mga pagpaningkamot.
“Dili lalim ang mahimong magtutudlo sa early education ug nakita nga kining 25 ka mga child development workers nag exert og extra mile not only as a teacher but also who served as second parent of this children who exerted efforts para mahimo nga successful iyang pagtudlo sa matag center ug gibasihan ang ilang exemplary performance,” matud ni Ocot ug miingon nga tanan sila naningkamot ug maayo ang performance.
Gawas kanila gihatagan sab og pasidungog ang mga retirees nga dako kaayo og papel sa ilang pagserbisyo sa kabataan ug sa ilang tagsa tagsa ka barangay.
Mokabat sa 750 ka delegado ang motambong niini nga okasyon, lakip na ang 725 ka child development workers ug 25 ka municipal og city social welfare and development officers sa 23 ka lungsod og duha ka dakbayan sa probinsya.