NAILHAN na ang usa ka inahan nga mibasura sa iyang bag-ong gi-anak sulod sa comfort room sa usa ka patigayon niadtong Enero 27 sa Zayas, Barangay Carmen, sa siyudad sa Cagayan de Oro.
Ang maong babaye nag-edad pa lamang og 17 anyos (identipikasyon gitago), usa ka tinun-an sa senior high school ug residente sa usa ka barangay ning siyudad.
Sa pakighinabi sa Superbalita Cagayan de Oro kang Police Major Jelesis Teves, hepe sa Police Station 4 (PS4) sa Carmen, gibutyag niini nga naila ang maong batan-on human nasubay ang numero sa plaka sa gisakyan niini nga dyip.
"Amo man nga gi-trace ang plate number sa jeep, mao to na-locate gyud namo siya, nagdumili pa gyud siya og angkon," matud ni Teves.
Nasayran nga anaa sa klase ang maong tinun-an dihang nisakit ang tiyan, hinungdan nga nananghid sa magtutudlo nga mopauli.
Samtang sakay sa maong dyip pasaheroan pauli na unta sa ilang balay, pag-abot sa Zayas, nihangyo kining nga mokanaog kay mopagawas og hugaw.
Samtang ang drayber sa dyip naghulat usab ug naabtan pa og 10 minutos. Pagbalik og sakay sa maong batan-on, giingong natingala ang kaubang mga pasahero nga basa ang gisuot niini nga sayal.
Dihang gihimo ang pagkuti-kuti ngadto sa batan-on, gibutyag niini nga nakurat siya sa iyang pagpangihi nga dunay nahulog gikan sa iyang bilahan.
Gidugang niini nga iyang giputol ang pusod sa bata gamit ang iyang kuko ug tungod sa kahadlok, iya kining gilabay sa basurahan.
Sutaon pa sa kapulisan kung dunay intensyon sa maong batan-on nga ibilin lang kini sa basurahan.
Gitakdang ipasaka na ang tukmang kaso batok sa maong inahan kinsa kasamtangang anaa usab sa ospital sa pagsulat niini nga balita.