USA ka giingong sakop sa New People's Army (NPA) nga sakop sa Front Committee 4B ang mitahan niadtong Hunyo 11, mga alas 12:00 sa udto sa Brgy. Matampa, lungsod sa Salay, Misamis Oriental.
Ang mitahan mihangyo nga itago ang iyang pangalan alang sa iyang seguridad.
Gibutyag ni Police Senior Inspector Arlyne Ranario, tigpamaba sa Misamis Oriental Provincial Police Office, nga dungan sa iyang pagtahan ang pagbitbit niini sa iyang M14 rifle nga adunay lima ka magazine ug 91 rounds of ammo.
Ang kapolisan nagtuo nga dako kini og posisyon sa walhong grupo tungod sa kadaghang bala ug dili basta-basta nga mga armas nga dala niini.
Nitumaw usab ang taho nga ang asawa niini lakip sa mibakwit diha sa hawanan sa Kapitolyo apan wala pa kini gikumpirma sa kapolisan.
Bisan ang tigpamaba sa mga bakwit nga si Sariza Acosta nibutyag sa SunStar Superbalita nga wala sila masayod nga adunay sakop nila nga NPA.
"Wala mi kabalo ana, kay kami diri mga lumad ming tanan ug among gipakigbisogan nga makabalik gyod mi didto nga wala ang presensya sa mga sundalo," matud ni Acosta.
