GIKALIPAY ni Mayor Oscar Moreno ang pahayag sa posibleng makaatbang sa politika sa sunod nga eleksiyon sa 2022 isip gobernador sa Misamis Oriental.
Nasayran nga unang nibutyag si Moreno nga seryusong gikonsidera ang pagpapili sa pagka-gobernador sunod nga eleksiyon samtang si Vice Mayor Peter Unabia Sr. sa Gingoog City ang nibutyag usab nga andam nga mo-atbang ni Moreno.
“Wala may problema na katungod man na sa tawo, lugar. You cannot blame anyone for exercising his or her right,” matud ni Moreno.
Gidugang pa niini nga nagpasalamat kini nga susama sila og panglantaw ni Unabia nga hiusahon ang Misamis Oriental ug Cagayan de Oro.
“And kung nagtuo siya nga he deserves to be governor, I have no problem with that lugar iya nang katungod. Nalipay lang ko kay iyang rason is ‘One MisOr, One Cagayan,’ which is precisely my line ang pagtinabangay,” dugang pa niini.
Si Moreno niingon nga sukad kaniadto sa tuig 1986 ug 1987, wala’y nahitabong panaghiusa sa siyudad ug sa Misamis Oriental. Wala pa kini mikompirma nga magpapili ug karong panahona tutokan una niini ang siyudad sa Cagayan de Oro.
Gidugang pa nga kung magpapili siya sa sunod eleksiyon, buot niini nga tutokan ang serbisyo sa panglawas.
“If ever I would do that, my main objective is to address the health services kay luoy kaayo ang health services karon sa probinsiya labi na ining universal health care program,” dugang pa ni Moreno.