GIPAPANUBAG karon si Cagayan de Oro City Mayor Oscar Moreno kalabot sa kantidad nga P79 milyon nga kasong plunder.
Ang Ombudsman’s Mindanao office didto sa siyudad sa Davao sa duha ka pahina ang nagmando niadtong Disyembre 7 nga gipirmahan ni Deputy Ombudsman Rodolfo Elman miderekta ni Moreno nga moduso na sa iyang counter affidavit sulod sa napulo ka adlaw.
Kini aron maghatag katin-awan sa mga alegasyon sa mga field investigators nga iyang gigamit ang kantidad pinaagi sa pag-isyu og walo ka mga nagkalain-laing tseke niadtong tuig 2015 taliwala nga wala kini appropriation ug wala gi-aprobahan sa konseho sa siyudad.
Base sa kamandoan ang Ombudsman Field Investigation Unit’s (FIU) criminal ug administrative complaints batok kang Moreno ang igo ug adunay unod.
Nagbasi ang FIU sa complaint nga unang gipasaka sa usa ka pribadong indibidwal nga mao si Clemente Atoc.
Gi-akusahan si Moreno sa kasong plunder, graft, technical malversation ug kasupakan sa Local Government Code.
Kahinumduman nag-atubang sab kini og laing mga kaso kalabot sa renta sa mga heavy equipment lease nga wala nag-agi sa public bidding ug pagrenta sa building sa Cagayan de Oro City boxing program nga walay awtorisasyon sa konseho.
Niadtong Lunes gihinabi sa mga sakop sa media si Misamis Oriental Governor Yevgeny Vincente Emano kinsa usa sa gitudlo ni Mayor Moreno nga maoy utok sa iyang mga kasong giatubang.
“Gagabon-gabon na siya ug gakalipong sa kadaghang kaso nga iyang giatubang ug ako dayon pasanginlan, bisan usa ka higayon wala ako nagduso og kaso batok kaniya,” matud ni Emano ug dugang sulti niini nga ang nahitabo sa iyang pagpungko gi-audit sa Commission on Audit (COA) ang Kapitolyo ug nadiskubre ang iyang mga gihimo nga pagpangawkaw.
“Dili si Emano ang nangita apan ang gobyerno maoy nangita kon giunsa kini niya pagamit,” dugang ni Emano.
Massive demolition
Samtang nagpakahilum ang kampo ni Moreno kalabot na usab sa mga kaso niini apan mibutyag nga kini parte lamang sa mga pagpangdaot.
Gibutyag ni Maricel Casiño-Rivera, head sa City Information Officer (CIO) nga dili na kini sila mohatag og komentaryo kalabot na sa mga kaso ni Mayor.
“Wala pa’y nadawat nga order ang mga lawyers and we would like to reserve our comments about the case as of the moment. Apan tataw kaayo nga kabahin kini sa ilang massive demolition job batok kay Mayor Moreno,” pahayag ni Rivera.
Gidugang pa nga wala’y laing gihimo ang mga Emano gawas lamang sa padayon nga pagpangdaot sa Mayor tungod kay dili niini madawat ang ilang kapildihan sa nilabay nga eleksiyon.
“They have been very cruel to him since Moreno defeated the Emanos in 2013. Wala na silay laing gihimo kundili ang pagdaot kay Moreno sa tinguha nga mabawi nila ang gahum sa siyudad,” dugang niini.