SAMARAN ang walo ka mga pasahero human nabanggaan sa taxi ang motorela niadtong Abril 2 mga alas 9:55 sa gabii sa Concordio Duel street, Barangay Carmen ning siyudad sa Cagayan de Oro.
Ang mga biktima naila nga sila si Mario Kionesal Go, 71; Cordilla Go, 75; Karl James Abrio, 21; Albert Engcong, 48; Elisa Lagbas, 42; Erna Amedina, 40; Epifanio Jandayan, 37 ug May-ann Lee, 26 samtang ang drayber sa motorela mao si Romy Toledo, 45, minyo nga taga Zone 12-B, Upper Carmen ning siyudad.
Naila usab ang drayber sa taxi nga si Lolito Estoque, 59, minyo nga taga Barangay 38 ning siyudad kinsa nagdala sa taxi nga mv 1303-93311.
Sa nahipos nga impormasiyon gikabutyag nga gisubay niining taxi ang pikas nga linya paingon sa este nga bahin apan nahitabo ang aksidente sa dihang nabanggaan sa taxi ang atubangan nga bahin sa motorela sigon na usab sa saysay sa nakakita nga si Julio Mabayo.
Giingong tungod sa panghitabo hinungdan nga nakaangkon ang mga pasahero og mga samad kinsa dali nga gidala sa pribadong ospital.
Samtang laing sakyanan ilabi na motorsiklo nga gipanag-iyahan ni Edgardo Amolata ug gimaneho ni John Amolata human nga giparada lamang kini ug nadamay sa dihang nahitabo ang aksidente.
Gipamugos usab sa drayber sa taxi nga si Estoque nga wala kini sala ug ang drayber sa motorela ang nibangga kaniya.
Ang maong drayber nga si Estoque ang kasamtangang anaa sa kapulisan.