NAGPAGAWAS karon og kamandoan ang Misamis Oriental Provincial Inter-Agency Task Force (IATF) nga kinahanglan nga dili molapas sa alas 6 sa sayong kagabhion matag adlaw, makapauli na sa probinsiya ang mga residente ug kini nga kamandoan sugod Mayo 16 hangtod Mayo 31, 2020.
Sa gipagawas nga gabayan gikan sa Provincial Health Office, gibutyag ni Jeffrey Saclot, PIO sa Provincial Task Force nga ang mga residente sa lalawigan sa Misamis Oriental nga mobiyahe paingon sa Cagayan de Oro o ubang dapit nga dunay kumpirmado nga local transmission sa coronavirus disease (Covid-19) kinahanglan nga makabalik na sa probinsya sa dili molapas sa alas 6 sa gabii susama usab sa mga dili taga probinsiya kinahanglan nga makapauli na sa ilang dapit sa susama nga oras.
Ang dili makatuman niini mamahimong person under monitoring (PUM) ug kinahanglan nga ipaubos sa 14-day quarantine.
“Pabilin gihapon nga og mogawas ka sa lalawigan sa Misamis Oriental anha ka sa Cagayan de Oro or other areas outside of the province kinahanglan makabalik ka sa wala pa nilapas ang alas 6 sa gabii,” pahayag ni Saclot.
Gidugang pa nga ang mga nanguli gikan sa ECQ o GCQ kinahanglan nga mopaubos sa kwarantina sa katorse ka adlaw.
Samtang giklaro usab sa maong kamandoan nga wala’y labot niini o dili ma-PUM ang mga medical personnel ug mga nagtrabaho sa mga ospital, dental clinics ug rural health units; mga cargo ug delivery vehicle apan kinahanglan nga lima lang ang gitugotan nga makabiyahe;uniformed personnel; government officials, mga empleyado ug official travel nga molapas sa alas 6 sa hapon apan kinahanglan nga ipresenta ang travel authority; media personnel; mga nagtrabaho og night shift o mga panggabii ; mga magpakonsulta o magpatambal ug ubang mga gitugotan sa National IATF, Northern Mindanao IATF ug Misamis Oriental IATF.
Ang mga magbiyahe nga mga essential ug walay kalabotan sa trabaho kinahanglan nga magbaton og travel pass ug gawas niana, kinahanglan nga ang naggikan gawas sa Misamis Oriental magbaton og health certificate nga non-PUI/PUM alang sa mga area nga ubos sa general community quarantine.
Samtang sa mga dapit nga ubos sa enhanced community quarantine o modified enhanced community quarantine, kinahanglan nga dunay negative Covid-19 test result ug Certificate of Quarantine Completion o non-PUI/PUM certificate lakip niini ang mga stranded nga Overseas Filipino workers (OFW).
Ang mga gikan usab sa ospital nga na-admit ug nakagawas na ilabi na sa mga dapit nga dunay local transmission sama sa Cagayan de Oro ang kinahanglan nga magkwarantina.
“Kung asa mo na-admit pagbalik ninyo sa Misamis Oriental kinahanglan kamo magkwarantina” dugang pa.
Hugot usab nga ginadili sa pagkakaron ang pag-angkas sa mga motorsiklo base sa gabayan sa IATF.
Ang mga masuta diha sa checkpoints nga dunay hilanat kinahanglan nga ipabalik sa dapit kung diin kini gikan ug tanan usab nga mga health protocols ang kinahanglan nga sundon lakip na ang pagtunob sa footbath, pagsul-ob og face mask ug uban pa.
Nasayran nga ang tanang dapit sa nasud ang gipaubos na sa GCQ gawas lang sa National Capital Region, Cebu City ug Laguna.