TIKLO ang duha ka mga lalaki nga misulay pagpanuhol sa Highway Patrol Group (HPG) bugti sa na impound nga sakyanan niadtong Nobyembre 12 sa buntag sa Barangay Kauswagan, dakbayan sa Cagayan de Oro.
Nasikop sila si Nasrodin Mitmug, 58, taga Rosario Heights, Iligan City ug Rolan Lucagbo, 38, taga Bagong Silang, Iligan City.
Sa nahipos nga impormasiyon, giingong nakurat na lamang si HPG Senior Police Officer 1 Sarge de Constantine Maceren nga imbes dokumento ang ipakita niini, gitunolan hinuon siya og P10 mil nga tignilibo.
Giingong na flag down nila ang sakyanan nga gimaneho sa usa ka Samsoddin gumikan kay gitaptan ang numero sa plaka nga UEO 358 ug sa dihang gisuta sa buhatan sa Land Transportation Office (LTO), nasayran nga wala kini record sa maong buhatan.
Gidala ang sakyanan sa opisina sa HPG hinungdan nga nanawag ang mga suspek ug mibutyag nga mobisita sa ilang opisina aron sa pagdala sa dokumento apan nakurat sa dihang gitunolan og dakong kantidad bugti sa pagpagawas sa sakyanan.
Una na nga mibutyag ang hepe sa HPG-Northern Mindanao nga si Police Superintendent Danilo Buentipo nga mas gipahugtan sa ilang buhatan ang anti-corruption labi na sa gipanghingusgan sa kasamtangang administrasyon.
Sa pagsulat niini nga balita, ang mga suspek anaa na sa ilang buhatan alang sa pag-atubang sa kaso nga ipahamtang niini.