PURSIGIDO ang anak sa kanhi mayor sa Siyudad sa Cagayan de Oro nga magpasaka og kaso batok sa konsehal sa dakbayan human nag-viral ang video diin gisinggit-singgitan si Reuben Canoy sulod sa hotel niadtong Biyernes sa buntag, Hunyo 7.
Nasayran nga anaa sa usa sa mga dakong hotel sa dakbayan si Canoy diin nagsaulog sa iyang ika-90 ka tuig nga adlaw nga natawhan kauban ang higala nga gikan pa sa Dakbayan sa Sugbo.
Gibutyag ni Rhona Canoy, anak sa kanhi mayor, nga niadtong higayona anaa usab sa maong hotel si Konsehal Zaldy Ocon namahaw human sa iyang programa hinungdan nga gitawag kini ni Canoy ug gikompronta kalabot na sa wala pag-air sa programa ni Canoy sa usa sa mga sibyaan sa radyo sa siyudad.
Gibutyag ni Rhona nga pasakaan gayud og kaso si Ocon tungod kay sobra na ang gihimo niini ug gani gi-andam na ang maong mga reklamo.
“Taman sa naa sa libro giingnan nako among mga laywer nga pangitaa ninyo taman sa ginhawa nga pwedi nato ma-file sa iyaha kay i-file ta na para mabuktot siya og inatubang, dili na pwedi I’m sorry but it’s too much already, mag petition pa ko sa KBP,” matud ni Rhona.
Gidugang pa niini nga nabalaka kini sa sitwasiyon sa iyang amahan niadtong higayona, ilabi na nga duna kini gihambing nga balatian ilabi na sa iyang kasing-kasing.
“My dad is in wheelchair, with a neck brace, with a heart condition, mu-claim si Zaldy nga kay gisinggit-singnitan kuno siya og una sa akong papa, do you think a 90 year old man in a wheelchair with a heart condition makasinggit nga wala atakihon?,” dugang niini.
Makita sa mubo nga video diin gani nag-viral kini nga gisinggit-singgitan ni Ocon si Canoy, kinsa naka-wheelchair sa pag-ingon nga si kinsa kini nga tawgon lang ug kasab-an ug gani namalikas dayong lakaw. Samtang gidugang pa ni Rhona nga gani niingon pa kini nga wala kini mahadlok bisan pa og suod ang mga Canoy sa kasamtangang presidente ug bisan pa nga ipapatay diin wala na kini diha sa maong nagkalat nga video.
Nagtoo si Rhona nga dunay kapungot kaniya si Ocon ug napahungawan ang amahan kini tungod na usab kay kapila na niini napost diha sa social media tungod sa kalapasan sama sa pagparking sa “no parking” ug gani gikabutyag nga gibirahan na kini diha sa programa n Ocon sa radyo.
Giingong lakip nga giduso ang mga reklamo sa civil service, sa buhatan sa mayor ug sa konseho sa siyudad, Department of Social Welfare and Development ug uban pa.
Samtang wala pay nakuhang pahayag ang Superbalita sa bahin ni Ocon kalabot sa insidente.