SUBLING nag-una sila Mayor Oscar Moreno ug Bise Mayor Joaquin Uy sa ikaduhang survey sa Xavier University–Ateneo de Cagayan’s Kinaadman: University Research Office (Kuro).
Gilangkuban sa usa ka libo ka mga botante sa siyudad sa Cagayan de Oro ang gipahigayong survey gikan sa Abril 27 ngadto na sa Mayo 1.
Nakuha sa lokal nga partido nga Partido Demokratiko Pilipino–Lakas ng Bayan (PDP-Laban) ang dakong porsyento sa mga botante ilabi na ni kasamtangang mayor nga si Moreno nga anaa sa 60.3 percent, apan niubos kini kumpara sa unang survey ug gisundan ni Jose Gabriel "Pompee" La Viña nga nakakuha og anaa sa 21.3 percent.
Ang duha usab ka mga independente nga mga kandidato nga sila si Felix Frias Borres nakakuha og 0.6 percent, samtang si Benjamin Tiu Contreras 0.0 percent ug ang wala pay desisyon anaa sa 17.3 percent.
Nagpabilin nga nag-una si Moreno sa distrito uno ug distrito dos nga anaa sa 59.8 percent sa distrito uno ug 60.7 percent sa distrito dos, samtang si La Viña anaa sa 18.4 percent ang nakuha sa distrito uno ug 23.9 percent sa distrito dos, samtang ubos sa 1 percent ang nakuha nila ni Borres ug Contreras ug ang undecided voters anaa sa 20.9 percent sa distrito uno ug 14.0 percent sa distrito dos.
Samtang nagpabilin usab nga ang running mate ni Moreno nga si kasamtangang bise mayor, Rainier Joaquin "Kikang" Uy (PDP-Laban), ang nag-una nga nakakuha og 59 percent nga gisundan ni kanhi mayor Vicente Emano sa Padayon Pilipino kinsa usab nakabsan na sa hinulamang kinabuhi niadto lamang Mayo 7 diin dunay 24.8 percent samtang ang undecided anaa sa 15.2 percent.
Nakakuha og boto nga 55.0 percent si Uy diin niubos kini og mga anaa sa 4.3 percent gikan sa unang survey nga anaa sa 59.3 percent, samtang nisaka si Emano gikan sa 23.6 percent sa bag-ong survey anaa na sa 24.8 percent.
Sa pagka-kongresista sa distrito uno, pabilin nga nag-una si kasamtangang kongresman nga si Rolando "Klarex" Uy sa PDP-Laban nga dunay 65.8 percent, gisundan ni Caesar Ian Acenas (Padayon Pilipino) nga dunay 15.4 percent ug Gil Banaag (PFP) nga 2.7 percent, samtang ang wala pay desisyon anaa sa 15.0 percent.
Nisaka si Uy gikan sa 66.1 percent paingon sa 65.8 percent, samtang si Acenas nakakuha og 16.4 percent ug niubos ngadto sa 15.4 percent, samtang si Banaag nisaka gikan sa 1.9 percent ngadto sa 2.7 percent.
Sa mga konseho sa distrito uno, PDP-Laban nga mga kandidato ang pabilin nga nagdominar sa 16 ka pwesto sa city council, diin walo ang gikan sa PDP-Laban ug usa sa Padayon Pilipino ug usa sa Partido Federal ng Pilipinas.
Una na nga gipasalig sa tinugyanan sa XU-Kuro nga independente ang gihimong poll survey ug giingong kini nga kalihukan isip pagtamod sa adbokasiya alang sa clean, honest, accurate, meaningful, ug peaceful (Champ) nga eleksiyon.
Giingong anaa sa 95 porsyento ang confidence level ang maong survey, gani niadtong 2016, sakto ang maong mga resulta sa survey gawas sa usa diin dunay wala naapil sa winning circle apan nakadaog.