MUABOT sa P25.8 milyones ang kinatibuk-an nga kantidad ang gitunol sa Provincial Government ngadto sa 23 ka lungsod, duha ka siyudad sa Misamis Oriental.
Ang tseke gitunol ni Misamis Oriental Governor Bambi Emano niadtong Huwebes, Mayo 21, 2020, dungan sa pagpahigayon sa Provincial Task Force for Covid-19, meeting.
Kini nga assistance tabang alang sa pakigbatok sa Covid-19 ug gikan sa calamity fund sa lalawigan.
Anaa ang presensya sa mga mayor sa nagkadaiyang lungsod.
Si Emano una na nisulti nga tungod sa iyang sayo nga deklarasyon nga state of calamity sa lalawigan, nagamit una sa mga barangay official ilang calamity fund alang sa unang hugna sa relief assistance sa kabarangayan.
Misunod dayon ang suporta sa mga mayor nga gikuha sab sa calamity fund sa lungsod nga nakapang apod apod og assistance.
Ang P25.8 milyones nga gitunol agi og suportang pinansyal sa mga residente sa kalungsoran.
Ang kantidad nga gitunol sa matag lungsod gibasihan ang kadaghan sa populasyon.
Ang mga lungsod nga nakadawat og P1.5 milyon kay adunay gibana-bana nga 10,000 ka household mao kining Balingasag, Claveria, El Salvador City, Gingoog City, Jasaan, Opol ug lungsod sa Tagoloan.
Ang mga lungsod nga nakadawat og P1 milyon adunay 5,000 ngadto 9.9k ka household gilangkoban sa lungsod sa Alubijid, Initao, Laguindingan, Magsaysay, Manticao, Medina, Salay, Talisayan ug Villanueva.
Samtang P700,000 ang nadawat sa mga lungsod nga aduna lamang 5,000 below ka mga household nga mao kining lungsod sa Balingoan, Binuangan, Gitagum, Kinoguitan, Lagonglong, Libertad, Lugait, Naawan, ug Sugbongcogon.
Si Dr. Jerie Calingasan ang chairman sa MisOr Provincial Task Force for Covid-19 niingon nga taliwala walay natala nga kaso sa Covid-19 sa lalawigan, magpadayon ang lalawigan sa pagtubag sa mga panginahanglan sa katawhan kon diin ang pundo gikan mismo sa calamity fund.
Dugang niini nga kung ugaling man mograbe ang sitwasyon sa Covid, ang Misamis Oriental aduna pay igong pundo alang niini.
"We have the money for the province of Misamis Oriental. Mao nang inot pero naa gyod among makout nga kwarta if unsay mahitabo aning Covid dinhi sa atong probinsya sa Misamis Oriental," matud ni Calingasan.