MOKABAT P300,000 ngadto P500,000 ang gipasalig nga itunol ni Governor Bambi Emano nga reward sa makatudlo sa killer ni Kapitan Claver Miral sa Napaliran, sa lungsod sa Balingasag, Misamis Oriental.
Matud ni Emano nga gipaabot lamang niya ang kumpletong report ni Police Colonel Rolando Destura, ang director sa Misamis Oriental Provincial Police Office.
Kini aron mahibaloan kon unsa gyod ang kinatibuk-ang motibo ug anggulo sa pagpangluthang sa Kapitan nga dumadapig kaniya.
"Tagaan nako og panahon nga makapasa sa kumpletong report ang atong kapolisan but definitely, laing reward na pod ang among itunol paghuman sa report. It ranges P300,000 to P500,000 reward," matud ni Emano.
Dugang sa gobernador nga dili niya buot unhan ang imbestigasyon sa kapolisan aron dili masaypan apan uwahi niyang nasayran nga duna nay gitutokan nga motibo.
"Dili lang ko magpasiuna kay basin masaypan ko sa imbestigasyon karon sa atong kwerpo sa kapolisan," matud ni Emano.
Si Destura niingon nga giwala nila ang posibilidad nga politika ang motibo.
Gipusil si Miral pauli gikan nagtambong og birthday party sa lungsod sa Jasaan ug paghidangat sa Puntagorda sa Barangay Hermano, gitaparan kini sa nagmotorsiklo ug gipusil.
Nadala pa sa balay tambalanan apan dead on arrival.