P4M nga bag-ong fire truck gi-donar

DAKO ang pasalamat sa kadagkoan sa Bureau of Fire Protection (BFP)-Northern Mindanao nga ang dugay na nila nga gipangandoy gihatagan og katumanan sa lokal nga kagamhanan sa siyudad sa Cagayan de Oro.

Gitunol sa lokal nga kagamhanan sa siyudad ubos sa administrasiyon ni Mayor Oscar Moreno ang fire truck sa buhatan sa BFP.

Gibutyag ni City Fire Marshall Superintendent Allan Cabut nga mapasalamaton siya tungod kay ila kining gipangandoy ilabi na nga dako kining tabang tungod kay maglisod sila panahon sa dunay mga nasinatiang sunog sa mga gagmay nga lugar.

"Actually, it is timely that the City Government naka procure og amoa gyud gihandom nga gitawag og Barangay Penetrator kanang gamay siya to penetrate in a small area kay maglisod man gyud mi," matud ni Cabut.

Samtang gibutyag ni Nick Jabagat, ulo sa City Disaster Risk Reduction and Management Department (CDRRMD), nga sa nilabay nga tuig kini nila nga proyekto labi na nga daghan nga sunog ang nahitabo sa nilabay nga tuig.

"Kung inyong madumdoman, early last year daghan kaayo sunog, usa sa problema sa atong Bureau of Fire mao kini kulang sila sa puwersa kay ang uban gi-ayo pa ang uban mga tiguwang na kaayo, unya maglisod sila og sulod sa lugar," matud ni Jabagat.

Gidugang pa ni Jabagat nga unang higayon kini ug diha sa pamunoan ni Moreno nga naghatag og fire truck ilabi na nga medyo dunay kamahalan kini nga ekipo gani anaa sa mga dili moubos sa P10 milyones apan kining nakuha sa maong buhatan gikan sa five percent nga disaster fund ug anaa lang kini sa P4 milyones.

"Nikabat siya og P4 million pasalamat pud ta sa nidaog sa bidding kay nihhatag og freebies," dugang pa.

Adunay 1,800 liters water capacity ang maong fire truck ug lakip niini ang duha ka bunker coat, base radio ug duha ka fire nozzle isip freebies.

Kahinumdoman nga nakadawat usab ang Cagayan de Oro City Fire District sa usa ka Super Tanker Fire truck nga dunay 10,000 liters water capacity nga donasiyon gikan sa nasudnong kagamhanan.