"Ang katuyuan karon, mga igsuon, mao nga unta niining gibuhat nga unang lakang sa gobyerno inyo untang mabati, inyo untang matilawan nga maundang na ang pagpatay sa Pilipino batok sa Pilipino."
Kini ang mensahe ni Misamis Oriental Governor Bambi Emano adlawng Huwebes diin gilusad ug gi-activate sa labing unang higayon ang Misamis Oriental Task Force to End Local Communist Armed Conflict (ECLAC) in Operationalizing Executive Order 70 and Convergence Areas for Peace and Development (CAPDev) Program sa Barangay Eureka, siyudad sa Gingoog, Misamis Oriental.
Kauban ni Emano paglusad niini mao sila si Department of Interiror and Local Government 10 Regional Director Arnel Agabe; Gingoog City Mayor Erick Cañosa ug Vice Mayor Peter Unabia; AFP 4th Infantry Division Commander Franco Gacal, 403rd Brigadier Commander Edgardo DeLeon; MisOr Provincial Police Director Robert Roy Bahian ug mga Assistant Secretary gikan sa PCOO ug DILG.
Aron kini makab-ot naghatod og nagkadaiyang serbisyo ang nagkalain-laing ahensya ngadto sa mga residente aron ilang mabati nga dili sila layo sa gobyerno ug labaw sa tanan dili mahaylo sa mga pasalig sa walhong grupong.
Lakip sa serbisyo ang paghatag og P600,000 nga tseke alang sa ilang covered court, mga seedlings ug liso sa mga utanon, libro, mga dulaan sa mga bata, bugas ug uban pa ngadto sa Barangay Eureka Gingoog City nga usa sa pinakalayo nga barangay nga dili gyod kanunay maabtan og tabang gikan sa gobiyerno.
Samtang ang lokal nga kagamhanan sa siyudad sa Gingoog nagdalit ug halad pangalagad sa katawhan kon asa sa maong isa ka adlaw nga kalihokan nabati sa katawhan ang serbisyo sa gobyerno pinaagi sa libreng ibot sa ngipon, checkup, pang hatag sa tambal, konsultasyon, tuli , libreng alot sa buhok, pedicure, pagrehistro sa wala pay marriage contract, birth certificate, Death Certificate, libreng mga abuno, semilya,Trucktor services, libreng wheelchair, libreng police clearance, libreng lukat sa cedula ug uban pa.
Gipasabot sab ni Emano nga napili ang barangay Eureka tungod kay concentrated kini sa kadagkoan sa NPA ug dalan ug nataliwal-an sa upat ka probinsya sa Agusan del Norte, Agusan del Sur, Bukidnon ug Misamis Oriental.
"Ideal kaayo nga i launch aron ipakita sa AFP nga dili imposible nga makab ot ang kahusay og kalinaw," matud ni Emano.
Kumpiyansa sab kining kung masustiner sa gobyernor molampos ang tinguha nga makab-ot ang kahusay ug kalinaw dili lang sa lalawigan apan tibouk nasod.
"Kung masustiner ang serbisyo ug dili mabati sa katawhan ang kagutom dili mapasagdan sa gobyerno nagtoo ko nga maghinungdan na sa pagsugod sa tinouray nga kahusay ug kalinaw," pahayag niini.
Highlights sab sa maong programa ang pagtunol sa moabot P1.5 milyon ubos sa Enhanced Comprehensive Livelihood and Integration Program (E-CLIP) ang giapod apod ngadto sa kanhi 23 ka mga sakop sa New People’s Army nga nagbalik na sa sabakan sa gobyerno, nagpasalig sab kini sila pinaagi sa pagpirma nga dili na balikan ang kasakit ug kalisod nga giagian sa kabukiran isip sakop sa walhong grupo.
Ang E-Clip usa sa programa ni Presidente Rodrigo Duterte nga motubag sa panginahanglan sa walhong grupo nga bout mobalik sa gobyerno ug kini sab ang paagi aron maulian ug matambalan ug wala nay mahitabo pa nga kagubot sa nasod.