SUPORTADO sa tinugyanan sa Cagayan de Oro Police Office (Cocpo) ang pamahayag ni Mayor Oscar Moreno nga dili na kinahanglan pa ang travel authority sa pagbiyahe sa siyudad sa Cagayan de Oro paingon sa Misamis Oriental.
Kini human nga susamang gihasol niini ang katawhan sa pagkuha og travel authority nga bisan duol ra ang adtoan ug dili na kinahanglan base sa interpretasiyon sa sumbanan sa Inter-Agency Task Force (IATF).
Gibutyag ni Moreno nga nagpasalamat siya tungod kay gidungog usab ang obserbasyon kalabot na sa travel authority ug gidala na kini ngadto sa Regional IATF human usab gidala sa Northern Mindanao Task Force.
Naglaom si Moreno nga ang interprestasyon niini mapatuman gumikan kay klaro kini base sa sumbanan tungod kay ang Cagayan de Oro parte pa man sa Misamis Oriental.
Samtang, gibutyag ni Police Major Evan Viñas nga suportado kini sa Cocpo gumikan kay hasol kini alang sa katawhan sa Misamis Oriental ug sa dakbayan.
Gawas niini, mas daghan pa ang mahimo sa kapulisan kaysa sa pagsige nalang og proseso sa mga gapangayo og travel authority.
Gani mas dako usab ang risgo tungod kay daghan ang katawhan ang nidagsa sa Cocpo headquarters ug sa nagkadaiyang police station.
Naglaom usab kini nga mahatagan og resolusiyon tungod kay makabenepisyo usab ang kadaghanan ug dili lang ang kapulisan.
Giklaro usab nga nagtuman lang sila sa kamandoan sa kaulohan ug hangtod nga wala pa'y bag-ong direktiba padayon una sila sa pagpangita og travel authority.
Gipahibawo sa kapulisan nga libre ang pagkuha sa travel authority ug kon ugaling pabayron gani kini, mamahimong mo-report ang usa ka indibiduwal sa ilang buhatan.