MAWAD-AN na og panginabuhian ang mga residente nga nanimuyo duol sa mga sementeryo human hugot na nga gidili ang paglapog diin lakip na ang pagpaaso.
Namatikdan nga nahimo nga pangwarta labina sa mga kabataan ang pagpaaso o palina ngadto sa mga tawo nga mogawas gikan nga nibisita sa lubong sa ilang mga mahal sa kinabuhi sa mga sementeryo ning kasaulogan sa Adlaw sa mga Santos ug Kalag.
Hugot ang pagbantay karon sa City Local Environment and Natural Resources Office (Clenro) diha sa mga maglapoglapog panahon nga mobisita sa mga sementeryo.
Matud sa Clenro nga ang pagpalina delikado labina sa kong anaa ang bagang duot sa katawhan aron malikayan ang pagka-suffocate.
"Apil na siya sa lapog, especially nga daghan ang tawo ang suffocation pud atong likayan for safety so higpit nga atong gibawal ang paglapog ug magpalina," butyag ni Sol Mosqueda, focal person sa City Memorial Park Development.
Ang masapon nga magpalina o magpaaso dunay multa nga P2,000.
Badlungon usab sa Clenro uban sa mga ahensiya ug kapulisan ug uban pa ang mga magsabasaba lakip usab sa ilang bantayan ang mga maglabay og basura atol sa kasaulogan.
Giklaro usab sa Clenro nga buot nila nga mabalik kung unsa gyud ang importansiya paghandom sa maong mga adlaw.
"Para mabalik ta kung nganong gi-celebrate ni nato which is i- commemorate nato sila by praying for their soul, mao lang na atong hangyo sa publiko nga dili party ang November 1 and 2 kundili kini pagpahinungod sa atong nangamatay," dugang niini.
Naandan na sa mga Katoliko ang pagpalina dayon gawas sa sementeryo diin dunay mga bata nga magpabayad og P2 sa mga tawo nga molakang sa ilang paaso.
Kini dunay pagtuo ang mga Pinoy nga kining aso makaabog sa demalas ug mga sakit-sakit gikan sa maong dapit.