ANAA na sa pagkadugta ang nagkulob nga patay nga lawas nga nasangit sa kahoy sa suba sa Iponan, Zone-4, Loop, Barangay Iponan, dakbayan sa Cagayan de Oro.
Ang patay nga lawas gibana-banang anaa sa 30-anyos ug nagsul-ob og pantalon ug t-shirt.
Sa impormasiyon nga nahipos, gikabutyag napalgan nalang kini sa usa ka residente nga nangahoy sa maong dapit.
Gikabutyag sa kapulisan nga sutaon pa nila ang tinubdan sa kamatayon sa wala pa mailang lalaki nga dunay samad sa dagway.
Walay nakuha nga identipikasiyon sa patay nga lawas sa biktima gawas sa kwarta diha sa iyang bulsa.
Sa pagsulat niini nga balita ang patay nga lawas ang anaa sa Billozos Funeral sa Bulua ning dakbayan.