NAGPAHIMANGNO na usab ang Regulatory and Complaint Board (RCB) ngadto sa mga ginikanan nga i-monitor usab ang ilang mga anak ilabi na kung menor de edad.
Kini human sa inspeksiyon sa RCB nga nasapon ang duha ka mga menor de edad nga anaa sulod sa imnanan kauban ang grupo sa mga estudyante sa senior high nga naka-uniporme pa.
Gipahimangnoan niabogado Edgardo Uy, tsirman sa RCB, ang mga ginikanan nga kung mahimo kinahanglan makisayod kini kung asa na ang ilang mga anak.
“Kinahanglan i-monitor nato ang schedule sa atong mga estudyante nga mga anak para mahibaw-an nato kung nakagawas na sa eskwelahan. Kinahanglan nga i-monitor gyud nato kay wala ta kabalo og aha na gipaingon kay ang primary responsibility naa sa ato mga ginikanan,” matud ni Uy.
Gipahimangnoan usab ni inspectorate team leader Antonio Resma Jr. ang mga estudyante, bisan nga dili mga menor de edad, nga unahon ang pag-eskwela ug undangon na ang pag-inom sa ilimnong makahubog tungod kay luoy ang ilang mga ginikanan nga nagkugi aron lang maka eskwela alang sa ilang kaugmaon.
Lakip usab ang mga operator ug mga nagbantay sa imnanan ang gipahimangnoan ug ang nakasupak gi-isyuhan og notice of violation.