GILUGWAYAN sa lokal nga kagamhanan sa siyudad sa Cagayan de Oro ang second quarter nga business permit renewal sulod sa usa ka bulan tungod sa epekto sa coronavirus disease (Covid-19) ngadto sa katawhan ingon man sa mga negosyante.
Niadtong adlaw nga Lunes atol sa regular session sa 19th City Council, gi-aprobahan niini ang giduso nga resolusiyon ni Mayor Oscar Moreno paghatag og lugway sa mga negosyante sa pag-renew sa ilang mga business permit.
Nasayran nga niadtong Abril 20 lang ang kataposang adlaw sa pag-renew sa second quarter nga business permit apan human kini na aprobahan sa konseho gilugwayan kini og hangtod Mayo 20, 2020.
Gibutyag ni Mayor Oscar Moreno nga dunay lugway sa mga negosyante sa pag-renew sa ilang mga business permit nga walay mga multa.
"Naay one month extension. Hopefully, kana wala'y penalty, wala'y surcharge but of course, dili ti-aw sad ni. We'll just have to make adjustments along the way. Lisod sad kaayo nga ang gobyerno labi na sa lokal og wala kay pundo wala kay maserbisyo sa katawhan," matud ni Moreno.
Naghangyo ang mga negosyante sama nalang usab sa Oro chamber gumikan na usab kay apektado ang sektor sa mga negosyante labi na sa mga nagsira nga mga patigayon gumikan sa Covid-19.
Una na nga nibutyag si Moreno nga dili ikalimod nga apektado gyud ang ekonomiya sa siyudad ug dili lang sa dakbayan apan sa tibuok nasud ug kalibotan.