LAING pasyente nga dunay severe acute respiratory illness (Sari) ang nakabsan sa kinabuhi niadtong Lunes, Abril 13, sa Northern Mindanao Medical Center (NMMC) ning siyudad sa Cagayan de Oro.
Ang maong pasyente residente sa Iligan City.
Gibutyag ni Mayor Oscar Moreno nga nakuhaan na kini og swab sample aron masayran kung positibo ug negatibo kini sa coronavirus disease (Covid-19).
“Kagahapon naa’y namatay na-admit siya the day before and then Sari. Nakuhaan og swab pero nag expire kagahapon sa buntag, wala pa ta kabalo kung positive siya or dili,” matud ni Moreno.
Nasayran nga ang ihap sa namatay nga na-admit sa NMMC nga gidudahang dunay coronavirus anaa na sa katorse diin usa lang ang positibo sa coronavirus disease (Covid-19) nga mao si PH40.
Sa maong katorse nga namatay duha niini ang nagpaabot sa ilang resulta lakip na ang maong namatay nga taga Iligan ug tulo niini ang wala makuha-i og swab sample samtang ang uban nga walo ang negatibo sa maong balatian.