Senior citizen, bata gidili na sa merkado

GIDILI na pagsulod sa mga merkado ang mga senior citizen ug mga bata subay sa pagpatuman sa mga gabayan aron nga mapakgang ang pagkuyanap sa coronavirus disease (Covid-19) sa dakbayan sa Cagayan de Oro.

Gibutyag ni Konsehal Ian Mark Nacaya overseer sa City Economic Enterprise Department (Ceed) nga gawas niana, gimando usab ang "No mask, No entry" diin dili mahimo makasulod kung dili magsul-ob og mask alang sa proteksiyon.

"Kung kinsa'y magsulod kinahanglan mag mask, ikaduha ang mga senior citizen ug bata dili na pwedi mosulod," matud ni Nacaya.

Gidugang pa usab niini nga duna sila'y dugang serbisyo nga gitanyag sa mga merkado alang sa mga senior citizen.

"Kung naay paliton sa mga senior citizen ang ato ng mga empleyado ang gapamalit para sa ila," dugang pa.

Nasayran nga matag alas 7:00 sa gabii hangtod alas 5:00 sa buntag sirado ang kamerkadohan alang na usab sa disinfection ug aron nga wala'y magtambay sa maong mga dapit.