USA ka 59 anyos nga babaye ang bag-ong positibo sa coronavirus sa Cagayan de Oro.
Kini ang ika 14 nga kumpirmadong kaso sa siyudad.
Gipasabot ni Dr. Laurren Nery, ang acting city health officer sa Cagayan de Oro, nga kining bag-ong nagpositibo silingan niadtong 62 anyos nga babaye kinsa nagpositibo sa Covid-19 ug namatay niadtong Mayo 16 nga gitalang pinaka unang positibo sa Macanhan, Barangay Carmen.
Gipasabot niini nga kasamtangan kini nga gibutang karon sa City Isolation Unit ug kasamtangan asymptomatic.
Gipasabot sab ni Nery nga sukad nagpositibo ang 62 anyos niadtong Mayo 16, ang area sa maong dapit sa Macanhan ang gi-contained ug walay gitugotan bisan kinsa nga makasulod niini gawas lamang sa residente sa dapit.
Una na nga nagpositibo ang bana ug anak niini niadtong Mayo 27, 2020 kinsa anaa karon sa City Isolation Unit ug kasamtangan wala nakasinati og sintomas.
Nasayran sab nga walo sa close contact sab niadtong 62 anyos lakip kining bag-ong positibo ang gikuhaan og swb sample ug kining 59 anyos nga silingan ang nigawas nga nagpositibo.
Kahinumduman, ang uwahing kaso nga ika 13 mao kining 49 anyos nga babaye kinsa gikan sa Cebu City ug naabot sa dakbayan sa Cagayan de Oro niadtong Mayo 25, 2020 ug sa protocol diretso kining gidala sa City Isolation Unit (CIU) aron sa 14 ka adlaw nga kwarantinas.
Ang 5 sa mga nagpositibo ang nakabsan sa kinabuhi kinsa 1 sa Barangay Camaman-an, 1 sa Barangay Bulua nga namatay sa Davao, 2 sa Barangay Carmen ug 1 sa Barangay Lumbia.
Samtang upat ang naka rekober diin 1 niini sa numbered Barangay, ug 3 sa Pinikitan, Camaman-an, ug ang duha ang kasamtangang anaa sa Isolation Unit.
Duha usab ang anaa sa Northern Mindanao Medical Center karong mga panahona kinsa anaa sa stable nga kahimtang.
Sa pagkakaron, ang siyudad adunay 5 ka aktibong kaso sa Covid-19.