GI-IMBESTIGAHAN pa sa kapulisan ug kasundalohan ang kamatayon sa usa ka sundalo human nakitang patay ug dunay pinusilan sulod sa opisina sa Camp Edilberto Evangelista, Barangay Patag, Cagayan de Oro City.
Giila ang namatay nga si Technical Sergeant Rogelio Asuncion, 43, taga Negros Occidental, Western Visayas.
Nagkadugo ug tapad lamang ni Asuncion ang kalibre .45 nga armas nga gituohang maoy nakapusil kaniya.
Si Asuncion usa ka liaison officer ug finance officer nga anaa na sa 23 ka tuig sa iyang serbisyo.
Gidugang pa nga hilumon usab kini nga klase sa pagkatawo.
Sa pakighinabi kang Staff Sergeant Hernan Abalde, imbestigador sa Police Station 4 (PS4) sa Carmen, gibutyag niini nga posibleng naunay ang biktima sa iyang armas samtang nanghinlo.
“Igo niya naa sa dughan. So far sa atong pag-imbestigar ani, wala man tay ingon nakita nga unsa pana diha. Mura og sa iyang paglimpyo-limpyo sa iyang armas siguro o pagbalik ani na accidental pagbuto siguro,” matud ni Abalde.
Gidugang pa niini nga wala usab sila’y nakitang mga ebedensiya sa iyang celfon.
“Naa kay naa man pud. Kay iyang armas nabungkag man ni. Sa cellphone wala man tay nakita man pud. Sa akoa lang, mura’g accidental nga panghitabo. Sa uban amo pa imbestigahan,” dugang ni Abalde
Nakuha ang lima ka buhing bala ug nakabuto na nga bala, lakip na ang maong armas.
Nasayran nga nag-inusara lamang sa maong buhatan si Asuncion atol sa insidente. Gisuta pa usab ang nigawas nga taho kalabot na sa pagkalambigit niini sa investment scam.