Task Force: Mga pabuto mapalit sa Rotunda ug mall

WALA’Y laing gitugotan ang Task Force Firecrackers nga pweding mapalitan og mga pabuto panahon sa Pasko ug Bag-ong Tuig kundili diha lamang sa Rotunda ug mall, ning dakbayan sa Cagayan de Oro.

Sa Rotunda, anaa sa 54 ka mga retailers ug usa ka wholesaler lakip na sa mall ang pulos nagkuha og special permit.

Sa pakighinabi kang Antonio Resma Jr., team leader sa Regulatory and Complaint board ug membro sa maong task force, mibutyag nga mapasalamaton sila nga wala’y nakasupak atol sa kasaulogan sa Pasko ug mas bantayan pa nila ang pagsugat sa Bag-ong Tuig ilabi na karong Disyembre 31, 2019.

“Labaw na gyud sa 31 kay kanang 31 mao man gyud ang kasagara nga tigpalit basig diha manggawas ang mamaligya sa merkado,” matud ni Resma.

Hangyo lang niini nga dili na lang mosulay sa pagpangompra diha sa Rotunda ug ibaligya sa palibot sa mga merkado tungod kay kumpiskahon gyud kini sa task force.

“Dili nalang sila mo try og kompra kay ingon ana mangompra sila sa Rotunda didto ibaligya sa palibot sa merkado, kay dakong posibilidad nga ma-confiscate kana kay dili man siya designated nga area. Sayang ang ilang puhonan niana,” hangyo niini.

Ginadili usab ang pagbaligya og mga pabuto ngadto sa mga menor de edad.

Karong panahona padayon ang inspeksiyon sa Task Force Firecrackers.