NATUKOD na ang usa ka grupo nga maoy moimbestigar sa pagpamusil patay kang Alfredo Zapanta ang kapitan nga gipusil patay sa Danao, lungsod sa Jasaan, Misamis Oriental.
Gibutyag ni Police Senior Inspector Arlyn Ranario, tigpamaba sa Misamis Oriental Police Office nga kamanduan ni Police Senior Superintendent Rolando Destura nga motukod og Task Torce Zapanta nga gipangulohan ni Police Superintendent Kenneth Balisang, kanhi nadestino sa kagubot sa Marawi City.
Sa pagkakaron, daghan pang anggulo ang gitan-aw sa kapolisan aron matumbok ang responsable sa pagpatay sa kapitan.
Giandam na usab ang reward money aron makatabang sa pagtudlo sa mamumuno.
Samtang si Misamis Oriental Governor Yevgeny Vincente Emano hugot nga mikondena ug nasubo sa kamatayon sa kapitan nga iyang kapartido sa PaDayon Pilipino.
Gibutyag niini nga doul na ang eleksyon sa ABC President sa lungsod sa Jasaan sa sunod semana ug walo nga sakop sa partido PaDayon Pilipino ang naghugpong nga magkahiusa. 15 ka mga barangay sa Jasaan pito ang sa ilang kaatbang.
Wala hinuon mihatag pa mensahe ang gobernador sanglit dili buot niini nga unhan ang imbestigasyon sa kapolisan.
Nasayran sab nga ang unang kagawad dili sab kapartido sa PaDayon Pilipino diin dako ang tsansa nga maparot ang grupo niini karon nga gipusil patay si Zapanta.
Kahinumduman gipusil patay sa nakabonnet nga mga suspek si Zapanta samtang gikan namahog sa iyang mga binuhing baboy.
