MGA 250,000 ka mga deboto ang niapil sa prosesyon nga nilungtad og duha ka oras gikan sa St. Augustine Cathedral paingon sa Jesus Nazareno Parish sugod alas 5:15 sa kaadlawon ug natapos alas 7:15 sa buntag, Enero 9.
Hapsay ug malinawon nga nahuman ang prosisyon ug walay natalang bisan unsa nga mga insidente atol sa usa sa mga dakong kalihokan sa Simbahang Katoliko.
Gibutyag ni Police Colonel Henry Dampal, director sa Cagayan de Oro Police Office (Cocpo), nga base sa mga regular nga mga deboto nga nag-apil niining prosesyon, mas daghan nga mga deboto ang niuban.
"Atong niagi, duna man tay estimate nga from 200-250,000 nga mga attendees. Kung moingon sila og mas daghan, siguro more than 250,000," matud ni Dampal.
Gidugang pa nga malinawon ang kinatibok-ang kalihokan.
"Generally peaceful. Peaceful gyud kaayo in the sense nga walay related incidents nga reported," dugang niini.
Nagpasalamat kini sa katawhan nga nisunod sa ilang mga pahimangno ug nisabot sa gipatuman nga seguridad atol sa Traslacion labi na sa kooperasiyon sa tanan.
Anaa lang sa duha usab ka mga indibidwal nga gitabang tungod kay aksiyon og luspad kumpara sa nilabay nga tuig nga anaa sa 15 ka mga tawo ug walay natalang mga naipit o nasamdan atol sa kalihokan.
Samtang gibutyag ni Police Colonel Mardy Hortillosa, kinsa tigpamaba sa Police Regional Office-Northern Mindanao, nga moabot 900 ka polis gikan sa rehiyon ang gi-deploy walay labot niini ang gikan sa Cocpo.
Sa pag-obserbar niini, iyang nakita nga organisado ang mga deboto ug walay natala nga mga insidente.
Ang katawhan sab namatikdan nga disiplinado diha sa pagsunod sa Traslacion ug taliwala nga nasinati ang pagtutalithi wala kini makababag sa kahiusa sa mga deboto mapaabot ug mapakita lamang ang ilang debosyon sa Itom nga Nazareno.