GISUGDAN na sa pagtunol ang unang hugna ngadto sa mga benepisyaryo sa social amelioration program (SAP) sa nagkadaiyang dapit sa dakbayan sa Cagayan de Oro.
Unang gitunolan ang katorse ka mga hinterland barangays o mga barangay nga anaa sa kabukirang bahin ning siyudad sa unang adlaw sa paghatag niini, Abril 23.
Karong Abril 24, usab sa unang distrito (1st district) ug Sabado sa ikaduhang distrito (2nd district).
Gibutyag ni Michael Christopher Fabello, ulo sa City Social Welfare and Development (CSWD), nga dili angayang mabalaka ang uban nga dili pa malakip niini nga hugna sa paghatag sa SAP.
“Nagsugod na kita sa first batch sa atong pag release sa SAP ug pag payout. Klaruhon nako first batch kay ang Cagayan de Oro gitagaan og 113,206 so ang beneficiary total sa Cagayan de Oro is 113,2016 families ni siya. Remember this is a family amelioration program dili individual,” matud ni Fabello.
Gidugang pa niini nga dili angayang mabalaka ang dili malakip sa unang hugna tungod kay naa pay mosunod nga mga batch nga matunolan niini nga assistance.
“Dili ta mataranta nga wala ta matagaan kay first batch pa lang kani. Gituyo na sa DSWD nga inanay ang paghatag aron dili magdasok ang mga tawo. Imagine-non raba gyud na ninyo igo-on ra nato ning 113,000 ka families? Kadaghan ana, lisod, mawala ang atong social distancing,” dugang pa.
Giklaro niini nga ang unang listahan gagikan gyud sa buhatan sa Department of Social Welfare and Development (DSWD) nga gilangkoban sa benepisyaryo sa Unconditional Cash Transfer (UCT), poor ug near poor. Samtang ang ikaduha nga listahan nagagikan sa City endorsement nga nagbase usab sa National Household Targeting System (NHTS) nga gi-survey sa tuig 2015 ug gi-validate sa tuig 2018 o maoy pinakabag-o nga listahan. Gi-endorso na kini ngadto sa buhatan sa DSWD alang sa cross checking ug listing.
Samtang ang ikatulo nga listahan mao ang sa barangay base na usab sa Disaster Assistance Family Access Card (DAFAC) nga anaa sa mga 140,000.
Ug ang ika-upat mao ang gitawag nga appeal system sa DSWD Covid-19 Intake Card (CIC) o mga wala malista sa DAFAC nga kinahanglan pa usab nga i-validate.
“Fourth batch pa na siya dili na tinuod nga tulo lang ka adlaw makuha na dayon sa isa ka semana ang kwarta,” pahimangno niini.
Samtang niabag usab ang kapulisan sa pagbantay sa mga tinugyanan nga nagtunol sa SAP sa mga kabarangayan.
Gibutyag ni Police Major Evan Viñas, tigpamaba sa Cagayan de Oro City Police Office (Cocpo) nga nag-deploy og gatosan ka kapulisan ang Cocpo base na sa mando ni Police Colonel Henry Dampal nga mao ang city director.
“Nagdeploy og 391 PNP personnel sa hinterland barangays para mag asister sa atong government employee specifically sa CSWD ug sa city government employee nga nag apud-apod sa social amelioration,” matud ni Viñas.