KUMBINSIDO ang usa ka inahan lakip na ang mga anak nga balbal o wakwak ang ilang nakita ibabaw sa atop sa ilang balay sa Barangay Consolacion, siyudad sa Cagayan de Oro niadtong niaging gabii.
Kini ang gituohang hinungdan nga nakuha ang giburos sa inahan nga si Marilou, 41.
Gibutyag ni Keith, 16, anak ni Marilou, dihang gihinabi sa SunStar Superbalita nga siya mismo nakakita sa maong wakwak.
“Nikamang siya una sa sin, nagkulambitay siya. Pag-ikaduha gipalongan mi og suga. Mura siyag baboy nga taas kaayog dila, niwang iyang bukton, tag-as kaayo iyang mga kamot ug kuko, dako kaayog tiil,” matud ni Keith.
Subay sa inahan nga niadtong niaging semana namatikdan na nila ang presensya sa giingong wakwak ug nakuha ang gisaburos niini. Samtang niadtong Martes sa gabii, Hulyo 23 nibalik na usab kini ug gisundan niadtong Huwebes sa gabii.
Gituohang gibalikan niini ang fetus nga wala pa nalubong tungod kay naghulat pa ang pamilya nga makauli ang bana.
Subay pa usab sa mga igsoon niini lakip na mga silingan nga nabalaka na kini sila, ilabi na nga daghang mga bata ug mabdos sa maong dapit.
Samtang nibutyag usab ang kapulisan sa Police Station 5 (PS5) sa Macabalan, ilabi na ni Police Executive Master Sergeant Ricky Bagas, nga walay kamatuoran ang alegasiyon gani lakip kini sa niresponde ilabi na nga naatlan kini nga naglibot-suroy sa maong dapit ug nangita sa maong balbal ug walay nakita.
“Niingon lage sila nga naay wakwak, naay balbal. Nitabang kog pangita lage, wala man gyud. Niingon sila nga nahimong iring, wala man uy. Wala man po’y nagpa-blotter. Ang tanan nga alledged nga naay balbal wala gyud,” matud ni Bagas.
Gidugang pa niini nga susamang nakahatag og kaalarma ug kabalaka sa mga residente ang maong alegasiyon, ug mas maayo nga pusposan kini ilabi na kung makitang nausab ug nahimong iring kung tinuod.
Samtang gipamugos sa pamilya ang ilang nakita gani man dili motuo og wakwak apan nakita gyud kini sa ilang mga mata.
Nagpabilin karon nga tanghaga sa mga residente sa maong dapit ang ilang nakita nga giingong wakwak.