GIKLARO sa Department of Education (DepEd)-Cagayan de Oro nga padayon ang enrolment sa mga tunghaan nga gilangkoban sa kindergarten, grade 1, grade 7 ug grade 11 sa mga pampublikong tunghaan sa dakbayan sa Cagayan de Oro.
Subay ni Alicia Anghay, assistant school division superintendent sa DepEd-Cagayan de Oro, nga ang enrolment magpadayon sa nagkadaiyang pamaagi apan wala’y personal nga inter-aksiyon.
“Magpadayon ang enrollment, daghan tag modalities nga pagahimuon, usual nato nga enrollment in the past kay face-to-face. Ang bata or ang ginikanan moadto sa eskwelahan apan karon ang atong enrollment nga pagahimuon pinaagi sa una pwedi mo text, ikaduha online katong dunay capability to access online, ikatulo duna tay mag drop boxes nga ipamutang sa mga eskwelahan,” matud ni Anghay.
Gidugang pa nga ang mga enrollment form nga anaa sa mga drop boxes pwedi nga kuhaon sa mga ginikanan sa bisan unsa nga panahon ug i-fill up ug ihulog ra usab pagbalik sa maong mga kahon.
Gipasabot usab niini nga kini nga proseso sa enrollment alang lang sa nahisgutang mga upat ka mga ang-ang sa pagtungha ug gipaniguro nga wala’y pag-atubang sa mga kliyente.
“Definitely wala’y face to face nga interaction ang atong himuon nga enrollment apan ang ato lang enrollment process mo-involve lang kini sa kindergarten, sa grade 1, sa grade 7 ug sa grade 11. Tungod kaning grades 2 to 6 ug kaning grades 8 to 10 dayon considered enrolled, so ang ilang data ipasa nalang namo sa sunod nga grade level,” dugang pa.