GIKLARO sa hingtungdan nga mga ahensiya nga walay fault line sa dakbayan sa Cagayan de Oro sukwahi sa mga gikataho diha sa social media.
Atol sa unang hugna nga nahitabong linog niadtong Oktubre 29, gibutyag ni Engineer Rolando Pacuribot sa City Engineering Office nga walay fault line nga nakita sa dakbayan.
"Wala, ang pinakaduol ang Tagoloan," matud ni Pacuribot.
Matud niya nga siya mismo nangutana sa mga hingtungdan nga ahensiya nga walay fault line ang dakbayan ug dili konektado sa giingong fault line sa Tagoloan, Misamis Oriental.
Kahinumdoman nga duha ka mga tunghaan ang dunay mga pagliki dinhi sa dakbayan niadtong unang pagtay-og sa Oktubre 29 ilabi na sa Bugo.
"Sa tanan namo nga gi-implement nga mga building, nga mga eskwelahan, ang naay gamay nga naigo ang Bugo. Ang akong pangutana, dili ba kay rason tungod siya ang pinakaduol sa fault line sa Tagoloan, iyang tubag dili? So walay relationship sa fault line nga duol kundili naigo lang gyud siya," dugang ni Pacuribot.
Nasayran nga dunay mga ginagmay nga pagdahili sa yuta atol sa pagtay-og o sa mga bag-ong dalan nga gibuksan ilabi na sa bukirang bahin sa dakbayan.
Apan, giklaro niini nga ila na kining gilaoman tungod kay bisan og walay pagtay-og duna kini mga pagdahili kay normal lang man kini kung magbukas og bag-ong dalan.