TULO ka tuig nga di mahimong makapamaligya ang usa ka dakong wholesaler og firecrackers sa dakbayan sa Cagayan de Oro human kini gi-ban sa Task Force Firecrackers tungod sa daghang kasupakan nga nahimo niadtong tuig 2018.
Matud ni Department of Interior and Local Government (DILG) city director Jane Doncallos nga dako kini nga wholesaler ug taliwala sa grabeng apela niini kanila, wala na kini gitugotan sa pagpamaligya karong panahona. Gibutyag sab ni Doncallos nga kini human sa massive nga kampanya sa hiniusang ahensya aron pagdili sa pagpamaligya og pabuto or firecrackers ning kasaulogan sa Pasko.
Nagkaanam og kagamay ang mamaligyaay og firecrackers dinhi sa siyudad gumikan sa kagamay sa halin ug kanunay nga alkansi.
“Definitely yes, nagkaubos, over the years nagkaubos, kung kaniadto nagkatag diha sa mga merkado pero karon gina-confiscate gyod na namo. It’s true gaingon sila ‘alkansi man mi,’ pero unsay among tubag ‘Ang inyong ginansya ang safety sa atong katawhan.’It’s unfair also nga they can make profit out of safety sa atong katawhan. Sa pagkakaron sa task force, they know unsay bawal,” kini ang tubag ni Doncallos sa SunStar Superbalita atol sa Talakayan nga gihimo sa Task Force illegal firecracker sa SM Downtown.
Gipahibalo sa opisyal nga dili mamahimong makapamaligya og firecracker kung walay special permit ug mapalit lamang sugod sa Disyembre 22 ngadto Disyembre 31.
Zero casualty ang gihingusgan karon sa grupo human nisaka ang tala sa niaging tuig gikan sa 10 ka kaso sa nabuthan og fire crackers sa rehiyon sa tuig 2018 hantod sa pagtabo sa 2019 nga moabot ngadto sa 13 ang natala.
Mibahad sab si Doncallos niadtong mga laing wholesaler ug retailer nga makasupak sa ilang mga gidili ang i-ban na sa pagpamaligya.
Sa dakbayan sa Cagayan de Oro, adunay 29 ka mga retailers ang aprobado ang permit sa niaging tuig ug lauman nga moubos ang ihap niini karong panahona.