LUGAR nga mingaw ug makabalik lantaw ba imong gipangita? Suroy nata diring dapita!
Kampo ni Juan nga makita sa Diclum Manolo Fortich Bukidnon siguradong imong higugmaon. Mga butang sa niaging kapanahonan gipreserba ug giampingan.
Dili mominos usa ka oras lamang ang biyahe ug maabot na lugar nga siguradong malingaw ka taliwala paman sa kamingaw. Gibuksan kini sa publiko tuig 2011 ug ang pangalan niini gikuha sa tag-iya niini nga mao si Dr. Juan Acosta.
Si Acosta usa ka agriculturist ug scientist kinsa eksperto sa horticulture ug mga plant breeding.
Gani, natilawan sa mga sakop sa media atol sa 1st Philippine Industrial Summit Media tour ang labing tam-is nga pinya nga tinanom niini pinaagi sa maayong pag breeding.
Si Acosta dako og kontribusyon sa larangan sa agrikultura sa nasod.
Nagtanyag sab og adventures ang Kampo ni Juan kung diin mahimo ka nga mag anicycling ang bersyon sa sky biking ngadto sa 100 feet ang katas-on.
Pwede sab ka molatas sa ilang taas nga hanging bridge, mag-zipline ug repelling. Mao kadto imong mahimo gawas sa kampo apan kung mosulod ka sa karaang balay, dinhi imong makita sa sulod ang mga karaang butang nga niadtong niaging kapahunan giampingan ug maayo karon.
Adunay mga libro nga mahimo ka og magbasa-basa. Adunay mga gitanyag nga mga rooms nga pwede sa overnight stay. Usa ka adlaw nga paglibot-libot dili nimo matapos. Sa dili pa mobisita sa lugar magtawag daan kanila aron ilang mapangandaman ang imong pagdangat.
Kung nagikan sa siyudad sa Cagayan de Oro maabot lamang kini nga lugar sa biyahing 45 ka minuto.
Unsa pay gihulat? Suroy na!