GITUBAG sa usa ka buotan nga police woman ang panawagan sa usa ka inahan nga matabangan ang iyang anak nga adlaw pa lamang gikan pag-anak nga na na-admit sa balay tambalanan ug nagkinahanglan og breastmilk.
Nag trending sa social media ug napuno sa pagdayeg si Police Officer 1 Llena Sol Josefa Mainar-Jovita sakop sa Human Rights/PNRCO sa WCPD sa Police Station 9 (PS9) sa Macasandig ning siyudad sa Cagayan de Oro.
Kini human ang inahan nga si Bhing Amatong, lumad nga taga Balingasag, Misamis Oriental nag-post sa facebook account niini og picture ni PO1 Mainar nga naghatod og 20 ka pack sa iyang breastmilk aron makatabang sa anak niining nagkinahanglan og gatas dihang na-admit sa usa ka pribadong balay tambalanan ning siyudad tungod kay adunay gihambing balatian.
Sa interbyu sa SunStar SuperBalita ngadto sa 34 anyos nga si PO1 Mainar gibutyag niini nga wala niya gidahom nga makahatag og atensyon sa kadaghanan ang sekreto niya nga paghatag sa iyang gatas sa usa ka bata nga nagkinahanglan.
“Nagpost man gud na iyang mama adtong August nga nagkinahanglan sila og breastmilk kay naadmit iyang anak una sa NMMC gibalhin sa Madonna,” matud ni Mainar.
Sa walay pagduha duha tungod kay labihan ka abunda ang iyang gatas nga sobra na sa iyang anak nga karon mag upat na bulan iya nalang I-pump ang gatas ug ipanulod sa sudlanan dayon ibutang sa refrigerator.
Nitakdo sab nga nagkinahanglan si Amatong og gatas hinungdan nga wala na siya’y daghang pangutana ug siya mismo ang mnhatod sa 20 ka packs nga gatas nga adunay sulod nga 4oz ngadto 9oz matag pack didto sa balay tambalanan.
Mao kini ang mga hulagway nga nag viral sa social media.
Simple lamang nga polis si Mainar nga nadestino sa PS9, matud niya nga Oktubre tuig 2017 naminyo sa sundalo nga si Jomark Jovita.
Naburos, ug nagkaanak via ceasarian section og usa ka healthy nga baby girl niadtong bulan sa Mayo.
Gisaysay niini nga struggle gihapon alang kaniya ang unang adlaw sa pagawas sa iyang anak tungod kay premirisa wala gyod mogawas nga gatas.
Pangandoy sab niya nga isip usa ka inahan mahatag ang insaktong nutrisyon ngadto sa anak nga sa gatas lamang sa inahan makuha hinungdan labihan gyod ang iyang pagpaningkamot nga makapagawas og gatas ug sa kanunay iyang gasige og latch ang anak.
Tungod sa tabang ug dakong suporta sa iyang mapinanggaon nga bana adlaw adlaw sab kini gapamalit og mga prutas ug gulay ug magsige og luto og sabaw aron makaprodyus og daghan nga gatas para sa ilang bag-ong nahimugso nga anak.
Kini atoll sa panahong silang duha nag maternity ug paternity leave.
Dinhi nagsugod nga miabunda ang agas sa iyang gatas ug hupong niini ang iyang anak.
Tungod kay sobra ang iyang gatas iya kining gaihatag ngadto sa nagkinahanglan.
Hangtod karon panahona sekretong gapadalhanan niini og gatas ang bata nga nagkinahanglan ug mapasalamaton nga discharged na sa kasamtangan.
Matud ni Mainar nga alang niadtong mga inahan nga bag-o pa nanganak apan walay motulo nga gatas nga dili mawad-an sa paglaom.
Sugyot niini alang sa mga ginikanan nga naglisod pagpagawas sa gatas:
Una, kanunay nga i-latch ang anak ug sige ipadede kay sa kadugayon nga pagsup-sop niini mogawas kini sa dili madugay.
"Wala ko nawad-an og paglaom. Pirme lang nato i-latch atong anak para naa gyod mogawas nga gatas." Matud niini.
Ikaduha, ayaw pa stress. Ang healthy nga palibot dako ug tabang sama sa mga supportive nga ginikanan, in-laws, mga kauban sa trabaho ug labaw sa tanan buhong ka sa gugma sa imong palibot dako kini kaayo og tabang.
Ikatulo isip ginikanan ug trabahnte kinahanglan ang insaktong time management.
“Dili babag ang imong trabaho aron mahatagan nimo og oras imong anak sa pagpasuso,” matud ni Mainar.
Dugang niini nga gawas sa paghatag og saktong nutrisyon sa anak naka save pa gyod ka og 1,000 pesos tungod sa kamahal sa formula karong panahon.
Madam Mainar sa imong sekreto nga pagkamatinabangon ug pagka wais nga misis makasulti ko og Super Kaayo ka!