Usa ang angol ug tulo ka mga balay ang nangaugdaw sa sunog nga niigo sa Kinasang-an Pardo, Siyudad sa Sugbo, alas 4:39 sa kaadlawon sa Miyerkules, Oktubre 25, 2023.
Base sa imbestigasyon ni F03 Fulbert Navarro sa Cebu City Fire Office (CCFO), ang sunog nagsugod sa balay nga gipanag-iya ni Irma Carano-o, 72, nga gipuy-an sa pamilya ni Joana Mae Toñacao.
Sumala sa CCFO, ang kayo nilamoy pa og laing duha ka mga balay nga niresulta nga tulo ang nangaugdaw, nga nakaapekto sa lima ka mga pamilya ug walo ka mga indibiduwal.
Samtang, ang angol giila nga si Gil Abapo, 70, kinsa dunay paso sa iyang tuong bukton.
Ang sunog gipasaka lang sa first alarm sa kabalayan nga ginama sa mixed materials.
Dugang sa CCFO, kini nagbilin og danyos nga dili mominos sa P300,000.
Atol ning pagsuwat, nagpadayon pa ang imbestigasyon sa kabomberohan aron masayran kon unsay hinungdan sa sunog.