Usa ka overseas Filipino worker (OFW) ug laing unom ka mga tawo nasikop sa raid sa mga sakop sa Philippine Drug Enforcement Agency (PDEA 7) uban sa mga sakop sa Mambaling Police Station sa usa ka drug den sa Sitio Catwalk, Barangay Duljo Fatima, dakbayan sa Sugbo, alas 5 sa hapon sa Martes, Enero 16, 2024.
Usa sa mga nadakpan ang suspetsadong maintainer sa drug den nga giila nga si Odello Laresma, 48, usa usab ka e-bike driver.
Ang mga naatlan sa drug den nga pulos gipangpusasan mao sila si Princess Joyce Reyes, 31, OFW; Liza Ladet Gumunit, 47, usa ka masahista uban sa PUJ drivers nga sila si Jerald CaƱizares, 32; Ariel De Pio, 43; Ronelo Abatayo, 48; ug Erwin Siman, 33.
Nasakmit sa mga operatiba ang 15 ka mga pakete sa gituohang shabu nga motimbang og 15 gramos nga dunay estimated market value nga P102,000.
Lakip sa nakuha mao ang mga pakete nga dunay residues sa gituohang shabu, buy-bust money ug nagkalainlaing drug paraphernalia.
Matod ni Leia Alcantara, information officer sa PDEA 7, nga usa ka semana nila nga gipaubos sa pagpaniid ang maong drug den human nadawat ang kasayuran gikan sa confidential informant.
Sa ilang nakuha nga impormasyon, makabaligya og 30 gramos matag semana si Laresma diin gipaubos pa nila sa imbestigasyon kon asa magkuhaan sa iyang supply sa ilegal nga drugas.