Nabalhug sa Dumaguete City Police Station sa Negros Oriental Police Provincial Office ang duha ka high value individuals human nadakpan sa gilusad nga buy-bust alas 3:00 sa kaadlawon, Huwebes, Mayo 1, 2025 sa Barangay Camanjac, Siyudad sa Dumaguete.
Ang duha ka mga suspek giila sa alyas lang nga Gege, 37, ug Jeb-Jeb, 22, pulos mga residente sa Lungsod sa Pamplona.
Nakuha gikan kanila ang usa ka kilo sa gituohang shabu nga adunay standard drug price nga P6.8 million.
Sigon sa Dumaguete City PNP nga una silang nakadawat og impormasyon nga nalambigit sa pagpamaligya sa ilegal nga drugas ang duha ka mga personalidad.
Tungod niini gipaubos dayon sila sa intelligence monitoring ug sa dihang nasuta nga tinuod ang impormasyon, gilusad ang buy bust .
Matod sa hepe sa Dumaguete City Police Station nga si Lieutenant Colonel Richmon Conag nga ang pagkasakmit sa maong gidaghanon sa ilegal nga drugas nahitabo tungod sa pag-abag sa komunidad aron masumpo ang nag-unang problema sa dakbayan.
Nag-atubang na og kasong kalapasan sa Section 5 ug 11, Article II, Republic Act 9165 ang mga suspek, nga gipasaka sa Dumaguete City Police Station. (AYB)