Nahimong trahedya ang outing sa dagat sa mga tinun-an human usa sa ilang classmate nalumos ug laing duha ang naluwas sa usa ka resort sa Sitio Bantayan, Barangay Tuyom, Dakbayan sa Carcar, alas 12:00 sa udto, Lunes, Abril 21, 2025.
Ang namatay mao si alyas Mark, 16, grade 11 ug molupyo sa Lower Tawog, Barangay Valladolid, Carcar kinsa dead-on-arrival (DOA) sa publikong tambalanan sa Carcar.
Naluwas ang duha ka mga tinun-an nga sila si alyas Kim, 16, taga Sitio Kapatagan, Barangay Perrelos, ug alias Jade, 18, taga Sitio Pergon, Barangay Valladolid, Carcar,
Si Police Lt. Col. Ruel Burlat, hepe sa Carcar City Police Station, nibutyag sa Superbalita Cebu nga mga concerned citizen sa lugar mao ang nipahibalo kanila nga alas 3:00 sa hapon sa naasoy nga adlaw adunay nahitabo sa maong lugar.
Dali nilang gisusi ang impormasyon pinaagi sa pag-adto sa tambalanan ug sa breach resort.
Sumala pa niini nga sa nakuhang impormasyon sa ilang imbestigador, nag-outing ang mga batan-ong tinun-an sa dagat aron pagsaulog sa ilang classmates nga nagsaulog sa ilang adlaw'ng natawhan sa Abril.
Apan ang mga biktima nga nalingaw sa pagkaligo naabot sa lawom nga bahin sa dagat.
“Naabot sila layo mga 300 meters ang gilay-on gikan sa baybayon apan sa ilang pagbalik paingon sa daplin diha na natibo..” matod ni Burlat.
Ang mga mananagat sa dapit nga nakakita maoy daling nitabang sa mga batan-ong nga nanawag og panabang.
Niabot sab ang mga sakop sa Philippine Coast Guard (PCG) personnel ug ang mga biktima gidala sa Cebu Provincial Hospital-Carcar City.
Nasayran sa Superbalita Cebu nga luwas na ang kahimtang nila ni Kim ug Jade, apan ang usa nga si Mark maoy gideklarar nga DOA.
Nasuta sa kapulisan nga alas 10:00 sa buntag nangabot ang batan-on ug nag-abang dayon sila og cottage.
Si Berna Nacua nga nakasaksi, nibadlong sa mga batan-on nga dili magpalayo apan wala mopatuo ug nangadto sa lawom.
Dugang nasuta sab sa kapulisan sa caretaker sa resort nga wala sila’y standby lifeguard.
Samtang gibutyag sa mga ginikanan sa mga biktima nga dili kini makamao manglangoy. / GPL