Patay na nga nadangat sa tambalanan ang pasahero samtang angol ang drayber sa panagbangga sa duha ka mga motorsiklo sa national highway sa Barangay Talaga, Lungsod sa Argao, Sugbo sa Sabado, Abril 12, 2025.
Ang biktima nga si Lucasia Mamaboy Gelbero, 78, taga Barangay Tiguib, Argao, sakay sa Honda TMX 125 nga gimaneho ni Juan Baqueran Alcoreso, 57, ug nagpuyo sa samang lugar sa biktima.
Ang duha gikan sa habagatang Sugbo paingon sa amihanang bahin.
Giingon nga nag-signal si Alcoreso nga moliko sa wala dihang nadasmagan sa laing motorsiklo nga gimaneho sa usa ka Emilio Belda, 31, taga Barangay Nalhub, Lungsod sa Dalaguete.
Wala na matud pa makahunong si Belda tungod sa kakusog sa dagan niini.
Ang mga naangol daling gidala sa Isidro Kintanar Memorial Hospital (ICKMH) apan, ang angkas nga si Gelbero gideklara’ng dead-on-arrival (DOA) tungod sa severe traumatic brain injuries secondary to motor vehicular accident.
Samtang si Belda kasamtangan nga gitanggong sa Argao Police Station alang sa dugang imbestigasyon. / ANV